السلام عليكم ورحمة الله وبركاته
أحب ابارك لنفسي أولاً 😜 ثم أبارك لكل ربعي واخواني وزملائي اللي تخرجوا معاي في الفصل الصيفي (2016)،
والحمدلله بعد عناء طال 25 عام، أعلن اليوم حصولي على درجة البكالريوس
B.Sc in MIS – Management Information Systems من جامعة الخليج للعلوم والتكنولوجيا – Gulf University for Science and Technology
والفال لكم جميعاً ان شاء الله وأسأل الله ان يوفقنا واياكم لما فيه خير في الدنيا والآخرة.
دخولي جامعة الخليج
في 2014 بعد تخرجي من كلية الدراسات التجارية كان قرار ناجح للأمانه 😎، وكنت محتار بين الدراسة في أمريكا أو الكويت! الخيار كان صعب ولكن قررت اكمل في الكويت لعدة اسباب وأهمها انهم يعادلون مواد من التجاري واقلل مدة الدراسة.
هل ندمت انك كملت بالكويت مو بأمريكا؟ لا والله ماندمت وعرفت أونس نفسي والدراسة في جامعة الخليج حلوة وخفيفة واللي يقولك صعبة هذا المشكلة فيه مو بالجامعة. داوم كلاساتك، اكتب نوت وعط الدراسة حقها وادرس قبل الامتحان تنجح وتطلع بقريدات تعجبك!
التخصص
لاتختار تخصص انت مو مقتنع فيه، ولا تخلي ضغوطات أهلك وربعك تأثر باتخاذ القرار. اخذ بنصيحتهم، اسمعهم شيقولون لك بس لا تختار تخصصك لان اهم قالولك زين. شوف ميولك واهتمامك واختار التخصص بناءاً على هالشي.
وانا اخترت تخصص ادارة نظم معلومات MIS لاهتمامي في التقنية، وبعد القراءة عن التخصص، شدني لأن فيه طريقة ربط وتطبيق التقنية في مجال ادارة الاعمال.
نصيحة:
اذا انت مو من النوع اللي يبون يخلصون الجامعة بسرعة ويضغطون على روحهم، وانا اشوف هالشي ماله داعي، حاول تدخل في كل الانشطة في الجامعة، واكتسب خبرة بكل شي مو بس دراسة. مثلاً:
ادخل نادي من النوادي الطلابية
استغل النادي الصحي في الجامعة أو الألعاب الرياضية (ريشة – تنس طاولة – سلة – قدم – سكواش .. الخ)
من أحلى الأيام وأفضل المراحل الدراسية
بالنسبة لي، من أحلى الأيام واللي تعلمت منها وايد اشياء في مجالي وغيره، هي أيام الجامعة.
كل كورس كنت أجرب شي يديد.. في اول كورس لي كنت ادرس بس، وبعدين قررت ادش نادي وسجلت في نادي علوم الكمبيوتر CS Club، وبعدها مسكت رئاسة النادي وتم تحويله الى Technology Club، وتعلمت من هالتجربة عن ادارة الاعمال اكثر وطريقة تطبيق اللي ندرسه على ارض الواقع.
مساعدة؟
اذا محتاج اي مساعدة او استفسار عن الجامعة أو تخصص ادارة نظام المعلومات في الجامعة
تقدر تتواصل معاي وان شاء الله احاول افيدكم:
Email: q8@outlook.com
Twitter: @y0us3f
